Fílsunginn fæddur og hann er 93 merkur (bls.)!

Búúúúin að skiiiiiiiiiilaaaaaaaaa!!!!!!!!

Svo satt!

Varð bara að deila með ykkur málshættinum mínum sem var alveg sérdeilis viðeigandi:

Meira vinnst með blíðu en stríðu

Farin á fílafæðingardeildina

Farin í bloggfrí til að sinna öðrum og mikilvægari málum (nei, kjánar ekki ástamálum!). Kem aftur 1. maí og get þá vonandi fært ykkur gleðifréttir (nei, ég er heldur ekki að tala um óléttu nema í óbókstaflegum skilningi!). Þarf að skutla einu stykki ritgerð frá mér, er búin að ganga með hana alltof lengi í hausnum. Meðgangan fer að nálgast meðgöngutíma fíla, svo nú er bara að rembast...

 

Opposites attract - eða þannig

Jæja, nú er nóg komið af klámfengnum tilsvörum og hálfkveðnum vísum. Ein helsta ástæða þess að ég svaraði ekki eigin spurningalista hér í færslunni á undan, er að sjálfsögðu skortur á framtakssemi á þessu sviði. Mín hefur vart verið við karlmann kennd svo mánuðum skiptir (og það þótt hún hafi oftsinnis verið kennd í návist karlmanna á þessu tímabili)! Hins vegar hefur framtaksleysið ekki hindrað hugann í að reika og augun í að njóta. Verst hvað hrifningarobjectið mitt þessa stundina er vonlaust case fyrir stúlku eins og mig sem trúir ekki á klisjur eins og ást við fyrstu sýn og andstæður laðast að.

Hann... er vaxinn eins og grískur guð                                                                                

Hún... er vaxin eins og grísk ólífuhrísla

Hann... elskar íþróttir

Hún... hatar hreyfingu

Hann... er atvinnumaður í boltanum  

Hún... er atvinnumaður í sukkinu

Hann... er dýrkaður og dáður af ungum sem öldnum                     

Hún... er hunsuð af ungum og ónáðuð af öldnum

Hann... er fyndinn stuðbolti 

Hún... er feiminn stressbolti

Hann... er frá Mars (erlendur ríkisborgari)                                       

Hún... er frá Venus (Nýja Íslandi)

Semsagt algjörar andstæður og engar líkur (eða a.m.k. stjarnfræðilega litlar) á að þessi súpernova (hann) og stjörnurykkorn (hún) nái nokkurn tímann saman. En rykagðan má nú halda í 0,00000000000001% vonina, ekki satt?

Forvitnilegir tímar kalla á krassandi keðjubréf

Jæja, þá er það komið á hreint. Kláðabólurnar þrjár voru víst bara ekta Flúða-flóabit eins og mig grunaði, en þær eiga það víst til að halda sig innan dyra og innan dýna þegar kalt er úti, blessaðar flærnar

En að allt öðru. Eins og mér finnst skemmtilegt að lesa svör annarra við alræmdum spurningalistum sem flæða alltaf annað slagið manna á milli í tölvupósti eða á Fésbókinni, finnst mér alveg hundleiðinlegt að svara slíku sjálf. Sérstaklega þykir mér leiðinlegt að sjá hversu lítið þeir hafa breyst í áranna rás. Er ekki löngu orðið tímabært að breyta þessum keðju-yfirheyrslum í takt við nýja tíma? Við lifum jú á tímum róttækra samfélagsbreytinga; tímum þar sem samkynhneigður kvenforsætisráðherra ræður ríkjum og Latex-hjúpaður Júróvisjónþátttakandi syngur hástöfum um flatlús og framhjáhald. Er ekki bara kominn tími fyrir opinskárri spurningalista á borð við þennan?:

Svæsnari spurningalistar sem vert væri að fá svör við (upphaflegar spurningar í grænu) 

1. Varst þú nefnd/nefndur í höfuðið á einhverjum? Varst þú nefndur eftir getnaðarstað eða -mánuði (D: Aþena eða Ágúst)?

2.Hvenær gréstu síðast? Hvenær fékkstu það síðast?

3. Líkar þér við skriftina þína? Líkar þér við stærðina þína (strákar)? Líkar þér við lyktina þína (stelpur)?

4. Hvað er uppáhalds hádegisverðarkjötið þitt? Hver er uppáhalds hádegisstellingin þín?

5. Áttu börn? Áttu vörn?

6. Myndir þú vera vinur þinn? Myndir þú vera "vinur"/bólfélagi þinn?

7. Notast þú við kaldhæðni? Notast þú við hjálpartæki?

8. Ertu ennþá með hálskirtlana? Ertu ennþá með sogblettina?

9. Teygjustökk? Teygjustökk nakin/n?

10. Uppáhaldsmorgunkorn? Uppáhaldsmorgunstellingin?

11. Leysir þú reimarnar áður en þú ferð úr skónum? Leysir þú brjóstahaldarann áður en þú ferð úr buxunum?

12. Uppáhaldsísinn? Uppáhaldstæknin?

13. Hvað er það fyrsta sem þú tekur eftir í fari fólks? Hvað er það fyrsta kynferðislega sem þú tekur eftir í fari fólks?  

14. Rauður eða bleikur? Ljósbláar eða harðbannaðar?

15. Hver finnst þér vera þinn stærsti galli? Hver er þinn stærsti galli í rúminu?

16. Hvaða persónu saknar þú mest? Hvaða fyrrverandi saknar þú mest?

17. Viltu að allir ljúki við þennan lista? Viltu að allir ljúki við þennan lista? ÓJÁ!

18. Hvaða litur er á buxunum og skónum sem þú ert í núna? Hvaða litur er á nærbuxunum sem þú ert í núna?

19. Á hvað ertu að hlusta núna? Hvaða lag kemur þér til?

20. Ef þú værir vaxlitur, hvaða litur værir þú? Ef þú værir titrari, hvað litur værir þú? 

21. Uppáhaldslykt? Uppáhaldslíkamspartur?

22. Hvern talaðir þú síðast við í síma? Hvern klæmdist þú síðast við í síma?

23. Líkar þér við manneskjuna sem merkti þér þessa umræðu? Langar þig í manneskjuna sem merkti þér þessa umræðu?

24. Uppáhalds íþrótt til að horfa á? Uppáhalds X-rated myndbönd til að horfa á?

25. Háralitur? Háralitur neðanbeltis?

26. Augnalitur? Opin eða lokuð augu við fullnægingu?

27. Notar þú linsur? Notar þú pick-up línur (bara einhleypir)?

28. Uppáhaldsmatur? Uppáhalds forleiksmatartegund?

29. Hryllingsmynd eða góður endir? Klámmynd eða heimagert vídeó?

30. Hvaða mynd horfðir þú á síðast? Hvaða klámmynd horfðir þú á síðast?

31. Sumar eða vetur? Undir eða ofan á?

32. Faðmlög eða kossar? Faðmlög eða koddaspjall á eftir?

33. Hver er líklegastur til að svara þessum pósti? Hver er líklegastur til að svara þessum pósti?

34. Hver er ólíklegastur til að svara? Hver er of mikil tepra til að svara?  

35. Hvaða bók ertu að lesa núna? Hvaða Tantra-bók ertu að lesa núna?

36. Hvaða mynstur er á músamottunni þinni? Hvaða Lady-Shave mynstur er á mottunni þinni (bara stelpur)? 

37. Uppáhalds hljóð? Uppáhalds hljóð/orð við climax?

38. Róling stónes eða bítlarnir? Róla eða bíta?

39. Hvað er það lengsta sem þú hefur farið að heiman? Hvað er lengsti tími sem þú hefur enst?

40. Hefur þú einhvern sérstakan hæfileika? Hefur þú einhvern sérstakan hæfileika í rúminu?

41.  Simpsons eða South Park? Trúboðinn eða Suður í Garð (69)?

42. Svör hvers hlakkar þig mest til að lesa? Svör hvers hlakkar þig mest til að lesa?

Svo nú er bara að spreyta sig á þessum uppfærða spurningalista, ef þið þorið, og senda á milli í tölvupósti. Fullri þagmælsku heitið!

 

 

Fátt að frétta nema af fáeinum líkams- og samfélagslýtum

Jæja, ég tóri ennþá...en bara rétt svo.

Lifði síðustu helgi af þrátt fyrir forspár um áfengisdauða sem til allrar hamingju rættust ekki. Mín reyndist meira að segja ein fárra sem entust lengst fram eftir nóttu við drykkju og söng. Sama er þó ekki hægt að segja um röddina sem gaf sig um óttubil á föstudegi og er fyrst núna, viku seinna, að komast í eðlilegt horf.

Annað sem er búið að pirra mig alla vikuna er bakið á mér, þ.e. ekki bakið í heild sinni, heldur þrjár bústnar bólur á bakinu miðju. Nú er það alls ekki svo gott að mín hafi lifað bólulausu líferni fram til þessa. Ónei, síður en svo. Þetta ætti því ekki að vera neitt nýtt né fréttnæmt og þaðan af síður ástæða til að blogga um. En þar sem þessar þrjár sakleysislegu, rauðu bungur hafa gert mér lífið leitt síðastliðna daga og nætur með ofsakláða og sviðasting, verð ég bara að færa þær til tals enda fátt annað komist að í huga mínum síðan þær ákváðu að taka bakið á mér í gíslingu. En svona er ég bara...geri veður út af smámunum (svo kallið mig bara fröken Framsókn).

Er búin að prófa ýmis krem, heit böð og hugleiðslu (reyndi að beina bólunum í burtu með því að senda þeim banvæn hugskeyti) en ekkert virkar. Sem fær mig til að álykta að þetta séu engar venjulegar bólur heldur kannski bara flóabit úr sumarbústaðaferðinni, stjórnarkreppuexem, ráðherraruglingsútbrot, flokkaskiptaofnæmi, já eða kannski bara grænar Framsóknarbólur.

Vona innilega að lækning á þessum hvimleiða kláða mínum finnist um eða eftir stjórnarmyndunarhelgi...

Ef ekki, verð ég bara að stinga á þessum kýlum sjálf og sjá til hvort lundin léttist ekki við það að hleypa gömlum sjálfstæðisgreftri út, og láta vinstri græna vinda leika um bert bakið áður en ég skelli einum Jóhönnu-plástri á sárið. Býst samt fastlega við því að bera útrásarbóluör og skuldalýti það sem eftir er.

Hinsta kveðja (eða bara ósmekkleg spámennska)?

Stjörnuspá

Tvíburar: Ef þú þarft að ganga frá trygginga- eða erfðamálum þá er þetta besti tíminn til þess. Hafðu líka aðra fjölskyldumeðlimi með í ráðum.

Ef þetta er ekki bara versta stjörnuspá sem ég hef fengið þá veit ég ekki hvað!

Vildi nú bara vera viss um að ná að kveðja áður en hún rætist, því ef ég skil þetta rétt er ekkert víst að ég verði nógu hraust eða lifandi á næstunni til að blogga meira...

...jæja, bless þá og sjáumst vonandi síðar (annað hvort hér eða í himnaríki, ég skal leggja inn gott orð fyrir ykkur við hliðið).

P.s. ekki búast við að erfa neitt eftir mig því ég á ekki neitt!

 

Cue in fake snow!

Nú þegar jólaseríurnar taka að hrynja niður af sjálfsdáðum er víst mál að taka niður skrautið og sætta sig við að jólin séu á enda runnin, ekki satt? Líklega bara fyrir bestu þar sem mín er búin að fá sig fullsadda af reyktu kjöti, smákökum og jólaöli, vökunóttum og útsofelsi. Það verður ljúft að fá aftur soðinn fisk, hrökkbrauð og kranavatn, góðan nætursvefn og vinnurútínuna. Of mikið af því góða er alls ekki gott til lengdar. Ofgnótt leti, matar og drykkjar um hátíðarnar jafnaðist þó ekkert á við ofurskammtinn af sjónvarpsglápi sem ég innbyrti líka þessa daga. Og hvílíkt og annað eins sjónvarpsefni, mín er hreinlega orðin gegnsósa af hinni alræmdu amerísku jólarómantík. En þessi árstíð er einmitt sú alvæmnasta í kvikmyndagerð.

Ekki nóg með að ég hafi horft á helling af jólakossaflensi undir mistilteinum og gervijólasnjó, heldur líka fullt af svonefndum jólafjölskyldumyndum sem innihalda a.m.k.; einn útbrunninn grínista í gervi Santa Sveins, eina lélega tölvugrafík af fljúgandi hreindýraflokki, 50 "álfa" á rítalíni, tvo stressaða (og yfirleitt fráskilda) foreldra, eina sykursæta og þrautþjálfaða barnastjörnu og slatta af fyrrnefndum gervisnjó sem hleðst upp í hári leikaranna í lok hverrar myndar.

Meðal þeirra "gæðamynda" sem báru fyrir augu mín á þessari jólavertíð voru; Miracle on 34th Street (flott frumgerð frá ‘47 og hallærisleg endurgerð frá ‘94 sem Sir Richard Attenborough lék Sveinka í, sá hlýtur að hafa verið illa staddur fjárhagslega fyrst hann lagðist svona lágt!), Santa Clause 3 (sem verður að teljast mesta ruglsteypan í flokki grínjólamynda það sem af er þessari öld), Home Alone II og IV (Sko, nr. 2 vakti hjá mér nostalgíu en nr. 4 vakti bara hjá mér klígju). Eina fyndna við þá mynd (IV) var lokasetningin þegar fjölskyldan sameinast á ný í hópfaðmlagi og stráksi ýtir á fjarstýringuna sína og segir: „Cue in fake snow!" sem sýnir að leikstjórinn hafði húmor fyrir sjálfum sér.

Svo sá ég líka The Holiday tvisvar sinnum, í frum- og endursýningu, en bara af því að Jude Law og Jack Black eru í henni...og talandi um þá tvo, þá væri það fullkominn karlmaður sem hefði lúkkið hans Jude og húmorinn hans Jack! Að lokum voru það Snow Wonder og Snow Globe, tvær skelfilega lélegar myndir sem betur væru gleymdar og grafnar undir tonni af gervisnjó, en geymdar í minningunni.

Eftir þennan óverdós af jólaást og -kærleika, jóla-aulahúmor og -aulahrolli, er gott til þess að hugsa að slíkar myndir verði ekki aftur á vegi mínum, fyrr en í allra fyrsta lagi næsta desember, þ.e.a.s. ef ég slekk ekki bara á sjónvarpinu í jólamánuðinum hér eftirleiðis. En ef ég þekki mína rétt þá verður jólamyndaógleðin gengin yfir að þeim tíma liðnum og ég sest í sófann; maulandi smákökur og þambandi jólaöl, yfir sömu endursýndu jólamyndunum og tárfellandi yfir mistilteinamómentum og snæviþöktum faðmlögum.

Tannmissir, langsveltir gullfiskar og barn á bjargbrún

Mín hefur löngum verið gædd þeim kosti/ókosti að geta sofið ofurvært á sínu græna eyra, nánast grunlaus um þá undraveröld sem kallast draumheimar. Hingað til hefur allt það sem kallast gæti draumar Dulúðar, gleymst jafnóðum og svefndrukknum augnlokum hennar hefur verið þrýst í sundur með valdi að morgni. Það litla sem eftir lifir eftir þau átök, eru brotakenndar og ruglingslegar draumaslitrur sem engin leið er að fá botn í. Þetta "lán" (að geta sofið líkt og ungabarn) hefur valdið mér miklu hugarangri á síðari árum, því þegar maður er orðinn þetta gamall er ekkert svo sérlega svalt að geta blundað eins og beibí.

Ekki síst í ljósi þess að flestir í kringum mann lifa afar innihaldsríku næturlífi og hafa gæfu til að bera að muna eftir draumförum sínum daginn eftir. Frásagnir af slíkum næturævintýrum hafa því ávallt vakið undrun mína og öfund og biðst ég velvirðingar á því að hafa ekki sýnt slíkum frásögnum mikinn skilning fram að þessu. En nú hafa undur nokkur og stórmerki gerst því mína er allt í einu farið að dreyma heilu bíósýningarnar, nánast hverja nótt. Og ekki nóg með það, heldur bendir ýmislegt til þess að mín sé orðin bullandi berdreymin í þokkabót!

Þar sem mín er nýgræðingur í dásemdar veröld drauma, verður nú nokkrum þeirra lýst af nákvæmni og ráðnir með aðstoð draumráðningaspekúlanta sem finna má netleiðis. Þeir sem haldnir eru þeim leiða lesti að dreyma hvorki eitt né neitt, eins og ég forðum, ráða hvort þeir lesa áfram. Hinir sem hafa meiri reynslu af þessum málum mættu gjarnan leggja orð í belg og hjálpa mér við draumtúlkanirnar (því það er jú ósköp takmarkað hvað A-Z Dream Dictionary Analysis Online getur gert svona netleiðis). Þeir sem halda að ég þurfi frekar á sálfræðihjálp að halda, mega alveg benda mér á slíka Free Online-þjónustu.

Draumur 1: Dreymdi að ég væri með skemmda, lausa tönn í miðjum neðri gómi sem datt svo úr.

Ráðning: Þessi er auðveldlega ráðinn. Flestir vita að þetta getur þýtt andlát einhvers nákomins. Og viti menn, daginn eftir fékk ég upphringingu þess efnis að „amma mín" í Mexíkó hafi látist.

Jæja, kannski ekki mjög nákomið en nálægt því.

Draumur 2: Tókst að drepa fullt búr af gullfiskum með því að gleyma að gefa þeim að borða.

Ráðning: "To see a goldfish in your dream, foretells of wealth and many successful and pleasant adventures. To see a dead fish, signifies disappointment and loss of power/wealth."

"To dream of killing animals indicates repression your instinctive nature." 

Jæja, þar fór það...ekkert ríkidæmi og engin ævintýri fyrir þennan bælda fiskimorðingja.

Draumur 3: Bjargaði ókunnu ungbarni frá því að hrapa niður þverhnípt bjarg.

"To see a baby in your dream, signifies innocence, warmth and new beginnings. Babies symbolize something in your own inner nature that is pure, vulnerable, helpless and/or uncorrupted. If you find a baby in your dream, then it suggests that you have acknowledged your hidden potential."

"The person or thing that you rescue may represent an aspect of yourself that has been neglected or ignored. They symbolise an aspect of yourself that is trying to find expression."

"Mystical Meaning: Mystical traditions claim that everyone has the potential to be super human. Deep within you there is a psychological resource that enables you to achieve just about anything. You can rescue any situation. Nothing is impossible."

Jæja, þessi bætti aðeins upp fyrir drauminn á undan. Það er kannski ennþá von fyrir mig.

Eða hvað, er nokkuð mark takandi á draumum?

Hvernig í fjandanum fór hann að því að ná fimmu?

„Ég er sko með FIMM háskólagráður; í sálfræði, uppeldisfræði, kennslufræði, sálfræði og ööö... mastersfræði."

Georg Bjarnfreðarson eftirherma (8 ára)

Jaaá, sæll! Ma´r hefði kannski bara átt að skella sér í svona Mastersfræði áður en ma´r fór að skrifa þessa bloddí ritgerð og læra hvernig á að skrifa Mastersritgerð. Vonandi verð ég ekki orðin jafn nöts og bitur og Georg þegar mér tekst loks að ljúka fyrstu alvöru gráðunni minni! 

Ein alveg að verða geggjuð gugga