Lagði lykkju á starfsferilinn og batt endahnút á atvinnuleysið

Jibbíjeii, mín er loksins búin að fá vinnu! Reyndar á ólíklegasta stað sem ég hefði getað ímyndað mér en öll vinna er vel þegin vinna, á þessum síðustu og verstu, og ég er barasta full tilhlökkunar yfir að takast á við prjónavörubransann, sléttan sem brugðinn! En aldrei hefði mig rennt í grun um hversu blómstrandi bissness þetta er, fyrr en ég sá með eigin augum hversu bandbrjálað er að gera í þessari litlu prjónabúð í hjarta miðborgarinnar.

 

Er búin að þrauka fyrsta daginn innan um fjöll af lopapeysum, sæg af innlendum prjónakonum og hjörðum af túrhestum og líst bara rosa vel á. Er algjörlega að upplifa æskudrauminn um að verða búðardama og held jafnvel að það gæti leynst smá sölutalent inni í minni. Náði til dæmis að selja Kana jakkapeysu með því að segja henni hversu vel hún færi við augnlitinn hennar. Og komst að því að ég er lúmsk smjaðurskjóða.

Andrúmsloftið er líka alveg einstakt þarna inni, mjög kósí og gamaldags með fornaldarvigt til að vigta plötulopann sem selst nánast í tonnatali. Meira að segja búðakassinn er stækkuð útgáfa af leikfangakassa sem ég átti sem krakki. Svona kassi þar sem maður þarf að stimpla inn verðin á gamla mátann (engin strikamerki þar á bæ) og það klingir í honum þegar hann opnast.

Nú er bara að sjá hvort lopapeysulyktin eigi eftir að smita út frá sér og fá mig til að læra að prjóna og hversu langan tíma það tekur þar til ég næ að fatta handavinnuhúmor samstarfsfélaganna.

 

Athugasemdir

[Hanna (IP-tala skráð) 9.11.2009 kl. 19:28]

til hamingju!

 hvert á mar svo að fara til að kíkja á þig á nýjum stað :)

[Sólveig (IP-tala skráð) 11.11.2009 kl. 09:07]

Til lukku með að vera komin með vinnu :)

[Guðrún Jóna (IP-tala skráð) 11.11.2009 kl. 19:31]

Þetta er engin spurning, Nína mín,  þú verður farin að prjóna í öllum frístundum áður en þú veist af

[Ingólfur (IP-tala skráð) 12.11.2009 kl. 19:34]

Tókstu 2 Háskólagráður til að selja lopa... bara 3 í viðbót og þá verður þú vaktstjóri :)

[Dulúð Jóns, 14.11.2009 kl. 15:44]

Takk, stelpur mínar. Ég er staðsett á Skólavörðustígnum og býst fastlega við því að ég verði prjónfær um leið og ég finn lausa frístund til að æfa mig. Þ.e.a.s. ef ég verð ekki komin með ógeð á lopa áður

Ingó minn, ég með mínar gráður stefni ótrauð á vaktstjórann. Kannski verð ég jafnvel sett yfir lopapeysudeildina þegar fram líða stundir.